Dremitja e shpeshtë ose dremitja e rregullt për periudha të gjata gjatë ditës mund të jetë një shenjë e demencës së hershme tek të rriturit e moshuar, zbulon një studim i fundit.

Të moshuarit që dreminin të paktën një herë në ditë ose më shumë se një orë në ditë kishin 40% më shumë gjasa të preken nga Alzheimer sesa ata që nuk dreminin çdo ditë ose dreminin më pak se një orë në ditë, thuhet në studimin e publikuar The Journal of the Alzheimer’s Association, transmeton portal arbresh.info

“Ne zbuluam se lidhja midis dremitjes së tepërt gjatë ditës dhe demencës mbeti pas rregullimit për sasinë dhe cilësinë e gjumit gjatë natës,” tha në një deklaratë bashkëautorja e lartë Dr. Yue Leng, një asistent profesore e psikiatrisë në Universitetin e Kalifornisë, San Francisko.

Rezultatet i bëjnë jehonë gjetjeve të një studimi të mëparshëm nga Leng, i cili zbuloi se dremitja dy orë në ditë rrit rrezikun e dëmtimit kognitiv krahasuar me dremitjen më pak se 30 minuta në ditë.

Studimi i ri përdori të dhënat e mbledhura gjatë 14 viteve nga Projekti Rush Memory and Aging, i cili ndoqi mbi 1,400 njerëz midis moshës 74 dhe 88 vjeç, me një moshë mesatare 81 vjeç.

Cilësia dhe sasia e gjumit bien me kalimin e moshës, shpesh për shkak të dhimbjes ose komplikimeve nga sëmundjet kronike.

Dremitja gjatë ditës mund të jetë gjithashtu një sinjal i ndryshimeve të trurit, thotë Leng.

Ajo iu referua hulumtimeve të mëparshme që sugjerojnë se zhvillimi i tau tangles, një shenjë dalluese e Alzheimerit, mund të jetë duke ndikuar në neuronet që nxisin zgjimin në zonat kryesore të trurit, duke prishur kështu gjumin.

Sipas saj, të rriturit duhet të kufizojnë gjumin e ditës në 15 deri në 20 minuta para orës 15:00, në mënyrë që të arriten përfitimet nga dremitja dhe shmangia e dëmtimit të gjumit të natës.

Përveç kësaj, të rriturit e moshuar dhe kujdestarët e njerëzve me sëmundjen e Alzheimerit duhet t’i kushtojnë vëmendje më të madhe sjelljeve të gjumit gjatë ditës dhe të jenë vigjilentë ndaj shenjave të numrit të tepërt ose të shtuar të gjumit, tha ajo.

Çdo rritje e konsiderueshme në sjelljen e gjumit duhet të diskutohet me një mjek./arbresh.info/